📢 𝗔𝗞𝗧𝗨𝗔𝗟𝗜𝗗𝗔𝗗𝗘 | 𝗚𝗢𝗩𝗘𝗥𝗡𝗨 𝗛𝗔𝗠𝗘𝗧𝗜𝗡 𝗞𝗢𝗢𝗣𝗘𝗥𝗔𝗦𝗔𝗨𝗡 𝗛𝗢𝗗𝗜 𝗞𝗢𝗠𝗕𝗔𝗧𝗘 𝗘𝗦𝗣𝗟𝗢𝗥𝗔𝗦𝗔𝗨𝗡 𝗢𝗡𝗟𝗜𝗡𝗘 𝗛𝗔𝗦𝗢𝗥𝗨 𝗟𝗔𝗕𝗔𝗥𝗜𝗞 𝗦𝗜𝗥𝗔 Díli, 06 Agostu 2026 – Governu Timor-Leste liuhosi Ministru Prezidénsia Konsellu Ministru, Agio Pereira, hala’o enkontru ho reprezentante Polísia Federál Austrália (AFP) hodi hametin kooperasaun estratéjika ba kombate esplorasaun online hasoru labarik sira. Iha enkontru ne’e, parte rua diskute kona-ba importánsia atu hametin kapasidade instituisaun nasionál sira iha prevensaun, investigasaun no resposta efetiva ba krime dijitál ne’ebé ameasa seguransa no direitu labarik sira. Diskusaun mós inklui dezenvolvimentu kapasidade téknika hanesan peskiza dijitál, jestaun evidénsia eletrónika no troka esperiénsia internasionál. Ministru Agio Pereira reafirma katak Governu kontinua komprometidu atu hametin kooperasaun interinstitusionál no internasionál hodi garante protesaun labarik sira iha ambiente dijitál no hasa’e efisiénsia instituisaun sira atu responde ba ameasa krime online. Polísia Federál Austrália (AFP) mós reafirma nia prontidaun atu kontinua fó apoiu ba Timor-Leste liuhosi formasaun espesializada, asisténsia téknika no fahe koñesimentu atu kontribui ba hametin kapasidade nasionál iha área seguransa siber no protesaun labarik. 📌 Fonte: Governu Timor-Leste #MNN #MehiNewsNetwork #TimorLeste #GovernuTL #AFP