𝐃𝐏𝐖𝐇, 𝐏𝐀𝐓𝐔𝐋𝐎𝐘 𝐍𝐀 𝐍𝐀𝐊𝐀𝐀𝐋𝐄𝐑𝐓𝐎 𝐒𝐀 𝐄𝐏𝐄𝐊𝐓𝐎 𝐍𝐆 𝐌𝐆𝐀 𝐌𝐀𝐋𝐀𝐊𝐀𝐒 𝐍𝐀 𝐏𝐀𝐆-𝐔𝐋𝐀𝐍—𝐒𝐄𝐂. 𝐃𝐈𝐙𝐎𝐍 𝘖𝘱𝘭𝘢𝘯 𝘒𝘰𝘯𝘵𝘳𝘢 𝘉𝘢𝘩𝘢 𝘯𝘢𝘯𝘢𝘯𝘢𝘵𝘪𝘭𝘪𝘯𝘨 𝘰𝘱𝘦𝘳𝘢𝘵𝘪𝘰𝘯𝘢𝘭 𝘴𝘢 𝘮𝘨𝘢 𝘣𝘢𝘩𝘢𝘪𝘯𝘨 𝘭𝘶𝘨𝘢𝘳 𝘴𝘢 𝘣𝘶𝘰𝘯𝘨 𝘣𝘢𝘯𝘴𝘢 Ngayong nagsisimula na ang pagpasok ng mga malalakas na bagyo sa bansa, inatasan ni Pangulong Ferdinand R. Marcos Jr. si Public Works Secretary Vince Dizon na tiyaking nakaantabay ang Department of Public Works and Highways (DPWH), kasama ang iba pang sangay ng pamahalaan, upang agad na tumugon sa mga lugar na madalas bahain at masigurong ligtas ang bawat mamamayan mula sa epekto ng mga pagbaha. Sinabi naman ni Secretary Dizon na patuloy na pinaghahandaan ng DPWH ang inaasahang epekto ng tag-ulan sa ilalim ng Oplan Kontra Baha (OKB), na nananatiling operational sa iba't ibang rehiyon, kung saan isinasagawa ang paglilinis, desilting, dredging, at pag-aalis ng mga obstructions sa mga waterways upang mapabuti ang daloy ng tubig-ulan at mabawasan ang panganib ng pagbaha. Sa kasalukuyan, isinasagawa ang DPWH OKB sa Metro Manila, Ilocos Region, Cagayan Valley, Tarlac, Naga, at ilang bahagi ng Visayas at Mindanao, kabilang ang Cebu, Iloilo, Bacolod, Cagayan de Oro, at Maguindanao, bilang bahagi ng patuloy na paghahanda ng pamahalaan ngayong tag-ulan.