𝐒𝐄𝐑𝐕𝐈𝐒𝐔 𝐌𝐈𝐆𝐑𝐀𝐒𝐀𝐔𝐍 𝐀𝐒𝐄𝐆𝐔𝐑𝐀 𝐒𝐈𝐃𝐀𝐃𝐀𝐔𝐍 𝐄𝐒𝐓𝐑𝐀𝐍𝐉𝐄𝐈𝐑𝐔 𝟑 𝐓𝐀𝐍𝐁𝐀 𝐔𝐙𝐀 𝐕𝐈𝐒𝐓𝐔 𝐓𝐔𝐑𝐈𝐒𝐓𝐀 𝐁𝐀 𝐀𝐓𝐈𝐕𝐈𝐃𝐀𝐃𝐄 𝐊𝐎𝐌𝐄𝐑𝐒𝐈𝐀́𝐋 𝐃𝐢𝐥𝐢, 𝟗 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔 (𝐒𝐑𝐏) – Hafoins simu informasaun hosi Servisu Informasaun Sekreta, Ekipa Operasaun hosi Servisu Migrasaun hala’o kedas operasaun rutina iha kapital Dili no konsege asegura sidadaun estranjeira na’in 3, ho inisial NK, NLM no DF ne’ebé deskobre uza vistu turista hodi hala’o atividade komersiál iha Kapital DIli. Durante operasaun ne’ebé dura oras haat, ekipa tama no halo inspesaun iha fatin sira hanesan hotel, karaoke no salon massage iha área Dili. Hosi inspesaun ne’e, ekipa konsege asegura sidadaun estranjeiru na’in 3 no lori kedas ba edifísiu Sentral Servisu Migrasaun, Ministériu Interior, iha Vila-Verde, atu submete ba prosesu investigasaun. Iha prosesu identifikasaun no investigasaun, investigador hosi Servisu Migrasaun deskobre katak sidadaun estranjeiru hirak-ne’e uza vistu turista, maibé hala’o atividade servisu ka buka rendimentu iha Timor-Leste. Prátika ne’e konsidera nu’udar violasaun ba dispozisaun sira iha Lei Migrasaun no Azilu. Tanba ne’e, autoridade sei aplika sansaun tuir prosedimentu legal, inklui pagamentu multa. Entretantu, ba sidadaun estranjeiru sira ne’ebé la kumpre ka rekuza atu selu multa, Servisu Migrasaun sei submete sira-nia lista naran ba Ministériu Públiku, atu bele prosesu tuir dispozisaun lei ne’ebé vigora. Servisu Migrasaun kontinua halo operasaun rutina no monitorizasaun ba atividade sidadaun estranjeiru sira iha Timor-Leste, ho objetivu atu asegura kumprimentu ba lei no regulamentu migrasaun.